Sommaropera!
Laurdag 27.juni kl 13 og 18
Opera midt i naturen!
For 8. år på rad ynskjer me velkomen til utandørs Sommaropera på Sehl. Publikum sit i tunet, og får servert musikalske høgdepunkt frå opera og operette brodert inn i ei lokal historie der humor og høge tonar går hand i hand. Framsyninga høver for heile familien, og er gratis for barn og unge t.o.m 21 år. Om du aldri har sett opera før, vil du lett kunne følgje med på historia, og om du har sesongkort i Bjørvika og kan alle librettoane utanat, vil du kanskje finne det interessant å sjå korleis arier og ensembler kan fungere i ein ny samanhang.
Det er 2 framsyningar: kl 13.00 og kl 18.00.
Området opnar 2 timer før. Sal av mat og drikke. Publikum sit under open himmel og må kle seg etter vêret.
Området har noko begrensa parkering, samkøyring er tilrådd. Publikum kan ha med eigne stolar eller teppe til å sitja på i grasbakken. Eit felt med stolar nær scena er tilgjengeleg for dei som vil sitja på flatmark.
Solistar: Mariann Fjeld-Solberg, Marit Sehl, Markus Bjørlykke og Jørgen Magnus Komani Haslum. Piano: Monica Tomescu-Rohde.
Manus og regi ved Marit Sehl.
Marie Klåpbakken Trio
Måndag 20.juli kl 19
Marie Klåpbakken Trio kombinerer norsk folkemusikk, vise-pop og sterke melodiar i eitt uttrykk der to feler står i sentrum. I samspelet mellom Marie Klåpbakken og Olav Luksengård Mjelva oppstår eit levande lydbilde der fele og hardingfele smelter saman i drivande unisoner, improvisasjon og gamle klangar – akkompagnert av stemningsfulle og rytmiske gitararrangement av Hans Martin Storrøsten.
Marie Klåpbakken - fele
Olav Luksengård Mjelva - fele
Hans Martin Storrøsten - gitar
Mellom Dovre og Blaafjellet
Laurdag 15.august kl 18
Ei firehendig reise gjennom Grieg, Ibsen og Agathe Backer Grøndahl.
I Operalåven i Hallingdal får Mellom Dovre og Blaafjellet ein særleg klang. Her, tett på fjell, folkeminne og forteljartradisjon, inviterer Monica Tomescu-Rohde og Shannon Wettstein Sadler publikum inn i Peer Gynt si verd gjennom firehendig klaverspel, forteljing og visuelle stemninger. Grieg sin kjende Peer Gynt-musikk møter Agathe Backer Grøndahl sin gåtefulle suite I Blaafjellet, og saman opnar dei eit landskap av fjell, trollskap, humor, mørke og heimkomst. Dette er Peer Gynt ikkje som støvete nasjonalsymbol, men som eit menneske me kjenner att: ein som diktar seg større enn sanninga, og til slutt må møte seg sjølv.
Flygelet i Operalåven er eit 120 år gamalt nyrestaurert Steinway, som verkeleg skal få vist seg frå si beste side når desse to renommerte pianistane slår seg saman.
Tonar til fjell
Onsdag 16.september kl 19
«Tonar til fjell» har Jo Asgeir Lie kalla eit nytt verk i fem satsar, der han har henta inspirasjon frå diktsamlinga «Jøkulsong» av Signe Seim. Trekkspel/akkordeon og strykekvartett møtast i eit samspel som både er ein dialog mellom to instrumentale verder, men også kontrastar mellom desse. Satsane har følgjande titlar:
I still undring, Så nært er alt, Undring, Sangenuten, Brea
Konserten vil òg innehalde ei anna suite:
Dances for clouds (2007) vart opphaveleg skrive for saxofonkvartetten The Erie Saxophone Quartet frå New York i 2007/08, og vart i 2025 omarbeidd til strykekvartett og trekkspel/akkordeon. Dances for clouds har også ein tittel som femner om naturen og det vi ser rundt oss.
Musikarar:
Marius Westling- fiolin
Sander Tingstad- fiolin
Bjørn Kåre Odde- bratsj
Maja Barrat Due- cello
Jo Asgeir Lie- trekkspel/ akkordeon
Operastjerner!
Sundag 4.oktober kl 15
Audun Iversen frå Harstad og Lina Johnson frå Austevoll er Norges mest kjende operapar. Med store, internasjonale karrierer er det sjeldan ein ser dei på små scener, og ein intimkonsert med desse to røystene saman er ei stor hending. Paret er busett i Oslo, der Audun for tida er på kontrakt med Den Norske Opera. På Operalåven får me høyre favorittrepertoaret deira - arier og duettar frå roller dei har spelt på ulike scener rundt om i verda. Audun kan med sin kraftige, men fløyelsmjuke barytonrøyst syngje både Mozart og Wagner med same eleganse, og den vakre sopranstemma til Lina får det til å høyres leikande lett ut å syngje partiar frå Verdi sine berømte operaer. Kven dei tek med seg ved flygelet vert bekrefta seinare.
Me ynskjer velkomen til ei oppleving med gåsehudgaranti!
Juli-desember
Programmet for andre halvår av 2026 er klart! Merk av datoar - billettsal opnar snart
Kjøp billettar
Billettar til alle våre framsyningar kan kjøpast direkte i skranken på Ål kulturhus, eller på heimesida til Ål kulturhus. Der kan du og kjøpe gåvekort til framsyningar i Operalåven.
Hugs at vi har gratis inngang for barn og ungdom t.o.m 21 år!